Սուրիոյ մէջ ընտրութիւնը պիտի կայանայ նախապէս նշուած ժամկէտին` յուլիսին
ԻԹԱՐ-ԹԱՍՍ կը հաղորդէ, որ Սուրիոյ տեղեկատուութեան նախարար Օմրան Զոհպի յայտնած է, որ
Սուրիոյ մէջ նախագահական ընտրութիւնը տեղի պիտի ունենայ ճշդուած ժամկէտին: «Ոչ ոք
լիազօրութիւն ունի փոխելու կամ չեղեալ նկատելու այդ ընտրութիւնը: Ատիկա տեղի պիտի ունենայ
ճշդուած ժամկէտին», նշած է Զոհպի: Ըստ նախարարին, թեկնածուներու դիմումներուն ընդունումը`
ընտրութեան մասնակցելու համար, պիտի սկսի 20 ապրիլին: Դիմումները պիտի ընդունուին
մօտ օրէն: Սուրիոյ քաղաքացիներուն ճնշող մեծամասնութիւնը կողմ է, որ Պաշշար Ասատ շարունակէ
երկիրը ղեկավարել», ըսած է ան: Սուրիոյ մէջ նախագահական ընտրութիւն նշանակուած է յուլիսին:
Պաշշար Ասատ, որուն պաշտօնավարման երկրորդ շրջանը իր աւարտին կը մօտենայ, տակաւին պաշտօնապէս
չէ յայտարարած, որ մտադիր է իր թեկնածութիւնը առաջադրելու, սակայն փորձագէտները կ՛ենթադրեն,
որ ան պիտի պահէ իր պաշտօնը: Միւս կողմէ, Ռուսիա երէկ յայտարարեց, որ իր ծովուժին
պատկանող 12 մարտանաւեր կը գտնուին Միջերկրականի մէջ: «ՌԻԱ Նովոսթի» լրատու գործակալութիւնը
հաղորդեց, որ Ռուսիոյ հիւսիսի նաւատորմիղի հրամանատար Վլատիմիր Քորոլովք լրագրողներուն
յայտնած է.«Հիւսիսի նաւատորմիղին պատկանող 12 մարտանաւեր ներկայիս իրենց առաքելութիւնը
Միջերկրական ծովուն մէջ կը կատարեն»: Միջերկրականի մէջ գտնուող ռուսական մարտանաւերը
կը գլխաւորէ «Մեծն Պետրոս» յածանաւը: Ինչ կը վերաբերի Միջերկրականի մէջ ռուսական մարտանաւերուն
առաքելութեան, հիւսիսի նաւատորմիղի հրամանատարը ըսաւ.«Շրջանային մակարդակի վրայ զսպման
եւ արեւելեան Միջերկրականի մէջ (ապահովական) գործողութիւններու համակարգը պահպանելու
առաքելութիւն կը կատարենք»: